ना जमे
तल्लीन होवूनी ऐकतो गीतरामायण
रामा सारखा पुत्र बनणे ना जमे !
टिव्हीवर पाहतो महाभारत मालिका
कर्णा सारखा दाता होणे ना जमे !
गोकुळअष्टमीला फोडतो गगनचुंबी दहीहंडी
कृष्णा सारखा सखा होणे ना जमे !
जोमात साजरी करतो शिवजयंती
शिवाजी सारखा राज्यकर्ता बनणे ना जमे !
दहा दिवस साजरा करतो गणेश उत्सव
गणेशा सारखा ज्ञानी होणे ना जमे !
होळीपौर्णिमेला पेटवितो होळी
दुर्गुणांची होळी करणे ना जमे !
रंगपंचमीला उधळतो रंग
जीवनाला रंग देणे ना जमे !
आनंदाने साजरी करतो दिवाळी
दुस-याच्या जीवनातील अंधार दूर करणे ना जमे !
सोने लुटुनी दस-या दिवसी करतो सिमोल्लंघन
विचारांची चौकट मोडणे ना जमे !
नऊ दिवस करतो देवीची आराधना
दुर्जंनांचे निर्दालन करणे ना जमे !
पुरणपोळी खिलावुनि साजरा करतो बैलपोळा
प्राणी-मात्रा वर दया करणे ना जमे !
करतो व्रतवैकल्ये आणि उपासतापास
काम,क्रोध,मोह,मत्सर त्यागणे ना जमे !
वर्षभर साज-या करतो आदर्शांच्या जयंत्या
त्यांच्यातील एकही गुण घेणे ना जमे !
कर्मकांड उत्सवात गेलो इतके गुंतून
ते करण्यामागचा विचार करणे ना जमे !
ते करण्यामागचा विचार करणे ना जमे!!
© महेश भा. रायखेलकर
Comments
Post a Comment